മുകുന്ദനുണ്ണി അസോസിയേറ്റ്സ്
ആഞ്ച് തരം മനുഷ്യരാണ് ഭൂമിയിലുള്ളത്. ആദ്യത്തെ വിഭാഗം അറിവ് തരുന്ന അത്രയും സുഖം വേറൊന്നും തരുന്നില്ല എന്ന് അനുഭവിച്ചതിനാൽ ആ അറിവ് നേടുന്നതിനും നിലനിർത്തുന്നതിനും പരമപ്രാധാന്യം കൊടുത്തു ജീവിക്കുന്നവർ. രണ്ടാമത്തെ വിഭാഗം ആദ്യത്തെ വിഭാഗം അറിവുള്ളവരാണ് എന്ന് ബോദ്ധ്യപ്പെട്ടതുകൊണ്ട് അവരുടെ ജീവിതം നോക്കി പഠിച്ച് അത് പിന്തുടരാൻ ശ്രമിക്കുന്നവർ.
മൂന്നാമത്തെയും നാലാമത്തേയും വിഭാഗം ഭൗതികവസ്ഥുക്കൾ തരുന്ന സുഖത്തോളം സുഖം മറ്റൊന്നിനും തരാൻ പറ്റില്ല എന്ന ഒരു ധാരണയിൽ അവയ്ക്കൊക്കെ വേണ്ടി ജീവിക്കുന്നവരും അവരുടെ ജീവിതവും രീതികളും പിന്തുടരുന്നവരും.
ആദ്യത്തെ രണ്ട് വിഭാഗം പലപ്പോഴും പരസ്പരം മനസ്സിലാക്കിയും എന്നാൽ ചിലപ്പോഴൊക്കെ കലഹിച്ചുമായിരിക്കും ജീവിക്കുക.
ഇങ്ങനെ തന്നെ ആയിരിക്കും രണ്ടാമത് പറഞ്ഞ രണ്ട് വിഭാഗക്കാരുടെ കാര്യത്തിലും കാണുക.
എന്നാൽ രണ്ടാമത്തെ രണ്ട് വിഭാഗക്കാരും ആദ്യത്തെ രണ്ട് വിഭാഗക്കാരും പലപ്പോഴും കലഹത്തിലായിരിക്കും. അപൂർവ്വമായി മാത്രമേ അവരെ അങ്ങിനെ അല്ലാതെ കാണൂ. ഇനി അഞ്ചാമതൊരു വിഭാഗമുണ്ട്, അവർ ഈ നാല് വിഭാഗക്കാരും ചിന്തിക്കുന്നതും ചെയ്യുന്നതും ചുമ്മാ നോക്കി നിൽക്കുന്നവരോ അവരിൽ ആരെങ്കിലും പറഞ്ഞാൽ അത് പോലെ ചെയ്യുന്നവരും ആയിരിക്കും. കാരണം അവർക്ക് ഇവരൊക്കെ പറയുന്നതും ചിന്തിക്കുന്നതും അത്രയേ മനസ്സിലാവുന്നുള്ളൂ എന്നതുകൊണ്ടാണ്.
ചൂഷണം ചെയ്യുന്നവരും ചൂഷണം ചെയ്യപ്പെടുന്നവരും ഈ നാല് വിഭാഗത്തിലും ഉണ്ട്. അഞ്ചാമത്തെ വിഭാഗത്തിലും അല്പസ്വല്പം ഉണ്ട്.
പക്ഷേ രണ്ടാമത്തെ രണ്ട് വിഭാഗങ്ങൾ ചെയ്യുന്ന ചൂഷണം ഏറ്റവും തരംതാണ തരത്തിലുള്ളവയായത് കൊണ്ട് അതാണ് പുറം ലോകം പെട്ടെന്ന് അറിയുക.
കാരണം പുറം ലോകം എന്നത് ഭൗതികമാണ്. ഭൗതികമായതാണല്ലോ എളുപ്പത്തിൽ മനസ്സിലാക്കാൻ കഴിയുന്നത്.
തെറ്റ് ചെയ്യപ്പെടുന്നത് മനഃസാക്ഷി എന്ന ഒന്നിൻ്റെ അഭാവത്തിലാണ്. മനഃസാക്ഷി എത്രത്തോളം ഇല്ലാതാവുന്നോ അത്രത്തോളം എന്തിനു വേണ്ടിയും എന്തും ചെയ്യും എന്ന അവസ്ഥയിലേക്കെത്തും.
മനഃസാക്ഷി എന്ന് പറഞ്ഞാൽ, ഏത് തെറ്റ് ചെയ്യാൻ പോവുമ്പോഴും ഉള്ളിൽ നിന്നും 'അരുതേ' എന്ന് പറയുന്ന ആ ശബ്ദം, അത് മനഃസാക്ഷിയുടേതാണ്.
തെറ്റ് പറ്റിയാൽ അത് അതോർത്ത് പശ്ചാത്തപിക്കുന്നതും പ്രായശ്ചിത്തം ചെയ്യാൻ പറയുന്നതും ഒക്കെ ആ മനഃസാക്ഷി തന്നെയാണ്.
ഈ മനഃസാക്ഷി എല്ലാവരിലും ഉണ്ട്. ഏതൊരു പ്രവൃത്തി ചെയ്യുന്നതിന് മുൻപിലും ഏതൊരു വാക്ക് ഉച്ചരിക്കുന്നതിന് മുൻപിലും ഒക്കെയായി ഈ മനഃസാക്ഷി അത് തെറ്റെങ്കിൽ 'അരുതേ' എന്ന് വിലക്കുന്നുണ്ട്.
ജന്മനാ ഉള്ള ഈ മനഃസാക്ഷിയെ അവഗണിച്ച് ജീവിക്കാനാണ് മനസ്സ് വികസിക്കുമ്പോൾ മനസ്സ് സ്വമേധയാ തന്നെ വ്യക്തിയെ പ്രേരിപ്പിക്കുക. നിയന്ത്രിക്കാൻ വലിയ ബുദ്ധിമുട്ടാണ് ഏതൊരാൾക്കും.
ഇങ്ങനെയുള്ള മനസ്സിനെ കൂടുതൽ വഷളാക്കാൻ എരിതീയിൽ എണ്ണയൊഴിക്കുംപോലെ ഇന്നത്തെ വിദ്യാഭ്യാസവും വിവിധ ചിന്താരീതികളും ഒക്കെ ഘട്ടം ഘട്ടമായി പഠിപ്പിക്കുന്നു. അവ പഠിപ്പിക്കുന്നത് ഈ മനഃസാക്ഷിയെ യുക്തി കൊണ്ട് എങ്ങിനെയൊക്കെ മറികടക്കാം എന്നാണ്. ധർമ്മബോധത്തെ എടുത്തു കളഞ്ഞ വിദ്യാഭ്യാസരീതി. ഭൗതിക വളർച്ച നേടാൻ ധർമ്മബോധത്തെ ഏതൊക്കെ തരത്തിലാണ് ഇനിയും വക്രീകരിക്കേണ്ടത്, ഒഴിവാക്കേണ്ടത് എന്ന കാര്യത്തിൽ അവിടെ തുടർ ഗവേഷണങ്ങൾ സദാ നടന്നുകൊണ്ടിരിക്കുന്നു.
അന്നന്നത്തെ ആവശ്യത്തിൽ കവിഞ്ഞുള്ള അന്നം ശേഖരിച്ച് വയ്ക്കുന്നത് പോലും സ്തേയമാണ് അതായത് മോഷണമാണ് എന്ന് അറിവുള്ള മനുഷ്യരുണ്ടായിരുന്നു ഒരു കാലത്ത് ഇവിടെ. ബുദ്ധിയിൽ അത്രത്തോളം സൂക്ഷ്മത കൈവരിച്ചവർ.
പക്ഷേ ഇന്ന് ഇങ്ങനെയൊക്കെ വെറുതെ പറഞ്ഞാൽ മതി പറഞ്ഞവൻ്റെ കാര്യം പോക്കാണ്, പിന്നെയല്ലേ ഇങ്ങനെ ജീവിക്കുന്നത്. ആ നിലയിൽ എത്തി നിൽക്കുന്നു ഇന്ന് സമൂഹം.
വിദ്യാഭ്യാസ സമ്പ്രദായം പൊളിച്ചെഴുതപ്പെടുന്നത് വ്യവസായ വിപ്ലവത്തോടുകൂടിയാണ്. ഇതേത്തുടർന്ന് അറിവ് ദ്രവ്യാധിഷ്ഠിതം മാത്രമായി. Materialistic education. ഇന്നത്തെ അക്കാദമിക്ക് വിദ്യാഭ്യാസം സത്യാന്വേഷികളെയല്ല ദ്രവ്യാന്വേഷികളെയാണ് സൃഷ്ടിച്ചെടുക്കുന്നത്. അങ്ങിനെയുള്ളവർക്കേ സമൂഹത്തെ മുന്നോട്ടു നയിക്കാനാവൂ എന്നാണ് ഇന്നത്തെ പൊതുബോധം.
സത്യാന്വേഷികൾ കുറയുകയും ദ്രവ്യാന്വേഷികൾ കൂടുകയും ചെയ്യുമ്പോൾ സ്വാഭാവികമായും മത്സരവും സംഘർഷങ്ങളും വർധിക്കും. ശാന്തി ഇല്ലാതാവും. തദ്വാരാ സമൂഹം അധഃപതിക്കും. ഇതിനെ കുറയ്ക്കാൻ നിയമങ്ങൾ കർക്കശമാക്കാനും പുതിയ നിയമനിർമ്മാണങ്ങൾ നടത്താനുമാണ് പോംവഴി പറയുന്നത്. ഒരു പരിധിക്കപ്പുറം ഇതൊന്നും പരിഹാരമാവില്ല ഇതിന്.
സ്വബോധം നഷ്ടപ്പെട്ടാൽ മനോരോഗിയായി എന്നാണ് അർത്ഥം. പക്ഷേ സ്വബോധം നഷ്ടപ്പെട്ടാൽ മാത്രമല്ല മനഃസാക്ഷി നഷ്ടപ്പെട്ടാലും മനോരോഗി ആവും.
സ്വബോധം ഭാഗികമായും മനഃസാക്ഷി പൂർണ്ണമായും നഷ്ടപ്പെട്ട രണ്ട് പേരുടെ കഥയാണ് ആ സിനിമ പറയുന്നത്.
അവർ കർമ്മത്തേയും അതിന്റെ ഫലങ്ങളേയും പറ്റി പറയുന്നതിന് മനോരോഗികൾ പറയുന്നതിൻ്റെ വിലയേ കല്പിക്കാൻ പാടുള്ളൂ.
ഇതേപ്പറ്റി മാത്രമല്ല അവർ പറയുന്നതിൽ എല്ലാറ്റിനും.
മേലെ പറഞ്ഞതിൽ മൂന്നും നാലും ഗണത്തിൽപ്പെട്ട ആളുകളുടെ ഇടയിലാണ് നിങ്ങൾ ജനിച്ചു പോയതെങ്കിൽ അവർ പഠിച്ച വിദ്യാഭ്യാസം നേടുകയോ ആ പഠിച്ചത് മറ്റുള്ളവരെ പഠിപ്പിക്കുകയോ ചെയ്യേണ്ടി വരും.
അവർ ചൂഷണം ചെയ്യുന്ന രീതിയിൽ ചൂഷണം ചെയ്യുകയോ ചൂഷണം ചെയ്യപ്പെടുകയോ ചെയ്യേണ്ടിവരികയോ ചെയ്യും.
അവർ കളിക്കുന്ന രീതിയിൽ കളിക്കുകയോ കളിപ്പിക്കപ്പെടുകയോ ചെയ്യേണ്ടിവരും.
അവർ കബളിപ്പിക്കുന്ന രീതിയിൽ കബളിക്കുകയോ കബളിപ്പിക്കപ്പെടുകയോ ചെയ്യേണ്ടിവരും.
ആദ്യത്തെ രണ്ട് ഗണത്തിൽ പെടുന്ന ആളാണ് നിങ്ങളെങ്കിൽ കാലം തെറ്റി ജനിച്ചു പോയ നിങ്ങൾക്ക് നിങ്ങളുടെ സങ്കല്പത്തിലുള്ളത് ഏത് ലോകമാണോ ആ ലോകത്തിലേക്ക് പോകുവാൻ പറ്റട്ടെ എന്ന ആഗ്രഹത്തോടെ പ്രണാമം. ആ ലോകമാകട്ടെ നിങ്ങളുടെ ഉള്ളിൽ തന്നെയാണ്. പുറത്തല്ല. ശ്രദ്ധയോടെ ജീവിച്ചാൽ ആ ലോകം കളഞ്ഞു പോകാതെ സൂക്ഷിക്കാൻ സാധിക്കും. ശ്രദ്ധ ഗുരുത്വം ഉള്ളവർക്കേ ഉണ്ടാവൂ. ആ ഗുരുത്വം നിങ്ങൾക്കും ഉണ്ടാവട്ടെ.
Comments
Post a Comment